რამდენიმე დღეში, 21 სექტემბერს, თბილისის მიხეილ მესხის სტადიონი ლეგენდებით გადაიჭედება.
საქართველოში ფეხბურთი განსაკუთრებით უყვართ. ბევრი ჩვენგანის ცხოვრება მის გარეშე მართლაც წარმოუდგენელია. ახლა კი წარმოიდგინეთ, რა მასშტაბის ბედნიერებაა, როდესაც შენი საყვარელი ფეხბურთელები, რომელთა ყველა მოძრაობას, დარტყმას და გოლს წლების წინ ტელევიზორიდან აღტაცებით შესცქეროდი, შენს ქალაქში ჩამოდიან და რამდენიმე დღეში, შენს თვალწინ ნამდვილ ცეცხლს დაანთებენ. მართალია, ნაკლები ენერგიით, სტამინითა და გამძლეობით, თუმცა იგივე კლასითა და ჯადოქრობით, როგორითაც წლების წინ თავბრუს გვახვევდნენ და გვაოცებდნენ.
21 სექტემბერს თბილისს ეწვევიან ლეგენდები, რომლებმაც მსოფლიო ფეხბურთი რადიკალურად შეცვალეს.
კაკა – ბრაზილიელი მაესტრო, რომელმაც მილანში უდიდესი წარმატებები მოიპოვა და 2007 წელს „ოქროს ბურთსაც” დაეუფლა.
კლარენს ზეედორფი – ფეხბურთის გენია, რომელმაც ოთხი ჩემპიონთა ლიგა ოთხ სხვადასხვა გუნდთან ერთად მოიგო. მისი ტექნიკა და ლიდერობის უდიდესი ნიჭი ფეხბურთის ისტორიის განუყოფელ ნაწილად იქცა.
რივალდო – ბრაზილიელი ვარსკვლავი, რომელმაც მსოფლიო მისი სილამაზით, ნიჭითა და ელეგანტურობით მოხიბლა. 1999 წელს ისიც კაკას მსგავსად „ოქროს ბურთის” მფლობელი გახდა. მისი დახვეწილი გოლები კი დღემდე გულშემატკივრების გონებაშია დალექილი.
კაფუ – შეუდარებელი მარჯვენა მცველი, რომელმაც ბრაზილიის ნაკრებთან ერთად ორი მსოფლიო ჩემპიონატი მოიგო. მისი სისწრაფე და დაცვითი უნარები ისაა, რასაც ყველა გულშემატკივარი ჯერ კიდევ ეტრფის.
და სხვა ლეგენდები, რომლებსაც თქვენც ბრწყინვალედ იცნობთ.
უცხოელებთან ერთად, მატჩის მონაწილეები ქართული ფეხბურთის ლეგენდებიც იქნებიან, რაც ამ დღეს კიდევ უფრო ამაღელვებელს ხდის.
გულშემატკივრები, რომლებიც ათწლეულების განმავლობაში უყურებდნენ ვარსკვლავების თამაშს, ახლა მათთან პირადად შეხვედრას შეძლებენ. ესაა ის, რაც ფეხბურთს განსაკუთრებულს ხდის – არა მხოლოდ თამაში, არამედ ემოციები, რომელიც ამ სპორტს ყოველთვის თან სდევს.
